சின்னத்திரையிலே பிரபலமான மற்றும் மக்கள் மனதில் இடம் பிடித்த நிகழ்ச்சியாக வலம் வரும் ‘குக் வித் கோமாளி’, 2019ஆம் ஆண்டு முதல் சீசனாக தொடங்கியது. இந்த நிகழ்ச்சி தமிழ் ரசிகர்களிடம் பெரும் வரவேற்பை அடைந்துள்ளது. தொடர்ந்து வெற்றிகரமாக 6 சீசன்கள் கடந்துவிட்ட நிலையில், சமீபமாக துவங்கிய ஆறாவது சீசன் தற்போது ஹாட் ட்ரெண்டிங்கில் உள்ளது.
சின்னத்திரையில் மாபெரும் வெற்றி பெற்ற நிகழ்ச்சிகள், பிற மொழிகளிலும் உருவாக்கப்படும் ரீமேக் வழக்கமாக நடப்பது. அந்த வரிசையில், ‘குக் வித் கோமாளி’ நிகழ்ச்சி மலையாளத்திலும் ஒளிபரப்பானது. ஆனால், அங்கு ஒளிபரப்பான முதல் சீசன் மட்டுமே நடந்தது அதன் பின் அடுத்த சீசன்கள் தொடரவில்லை. தமிழில் மட்டும் தொடர்ந்து நின்று கொண்டு இருக்கும் இந்த நிகழ்ச்சி, ஒரு கலர்ஃபுல் உணவுப் பண்டிகையாக ரசிகர்களால் கொண்டாடப்பட்டு வருகிறது.
தெலுங்கில் குக் வித் கோமாளி ஆரம்பம்
இந்த சூழலில், தற்போது தெலுங்கிலும் ‘குக் வித் கோமாளி’ போன்ற நிகழ்ச்சி அறிமுகமாகியுள்ளது. இந்த நகைச்சுவை கலந்த சமையல் போட்டி நிகழ்ச்சிக்கு ‘Cook With Jathi Ratnalu’ என்ற தனிப்பட்ட மற்றும் கவனம் ஈர்க்கும் தலைப்பு வைக்கப்பட்டுள்ளது. இந்த நிகழ்ச்சியில் பிரபல நடனக் கலைஞர் ராதா மற்றும் சினிமா ரசிகர்களுக்கு நன்கு பரிச்சயமான நடிகர் ஆசிஷ் வித்யார்த்தி ஆகியோர் நடுவராக பணியாற்றுகிறார்கள்.
தமிழில் வெற்றிகரமாக நடந்த ‘குக் வித் கோமாளி’ நிகழ்ச்சியின் செல்வாக்கு, தெலுங்கிலும் பரவத் தொடங்கியிருக்கிறது என்பதே இதன் முக்கிய சிறப்பாகும். மேலும், இந்த நிகழ்ச்சியில் பல பிரபலங்கள் போட்டியாளர்களாக கலந்து கொண்டு கலக்கி வருகின்றனர்.
அதிலும், சின்னத்திரை ரசிகர்களிடையே தனி ரசிகர்கள் வட்டத்தை பெற்றுள்ள ‘சிறகடிக்க ஆசை’ சீரியல் கதாநாயகி கோமதி பிரியா இந்த நிகழ்ச்சியில் போட்டியாளராக சிறகடிக்க ஆர்வத்துடன் எண்ட்ரி கொடுத்துள்ளார். தன்னுடைய புதிய அவதாரத்தால் ரசிகர்களை ஆச்சரியப்படுத்தும் விதத்தில், இந்த நிகழ்ச்சி துவங்கிய முதற்கட்டத்திலேயே பரபரப்பான திருப்பங்களை தர ஆரம்பித்துவிட்டது.
