தன்னுள் ஒளி கண்ட மனிதனுக்கு
இருளென்பதோர் பெயரே இல்லை;
நம்பிக்கை எனும் நெருப்பை ஏந்தினால்
நெஞ்சம் தானே தீபமாகும்.
பிறப்பால் யாரும் பெரிதல்ல,
பெருமை பெறுவது எண்ணத்தினால்;
உள்ளம் உயர்ந்த உச்சியிலே
உயர்வு தானே வந்து நிற்கும்.
வீழ்ந்த போதும் வலிமை காக்கும்
விழிப்புணர்வே தன்னம்பிக்கை;
தோற்ற இடத்தில் தேறல் தேடி
தொடரும் பயணம் வெற்றிப் பாதை.
பயமென்பது பேதை எண்ணம்,
பணிவோ அல்ல பலவீனம்;
அச்சம் நீங்கும் அன்றே மனிதன்
அறிவின் அரசன் ஆவான்.
கல்லென நிற்கும் கடும் தடையும்
கரைந்தே போகும் காலம் வரும்;
உழைப்பும் நம்பும் துணிவும் சேர்ந்தால்
உலகம் நமதே என்பதுண்மை.
பிறர் நகைக்கும் பேதைச் சொற்கள்
நெஞ்சில் சாயல் பதிக்காதே;
உன்னை நீயே மதித்த நொடியில்
உயர்வு உன்னை மதிக்கும்.
தோல்வி என்பதோர் தீர்ப்பல்ல,
தூண்டும் ஓர் பாடம் அதுவே;
கற்றுக் கொண்டால் கடந்து செல்ல
காலம் தானே வழி தரும்.
விதியைக் குற்றம் சொல்லும் முன்னே
வினையை நீயே சீரமை;
உன் கையில் தான் நாளைய உலகம்
உறுதியுடன் நம்பு அதனை.
எண்ணம் தூய்மை, செயல் நேர்மை,
இரண்டும் சேர்ந்த நெஞ்சம் வலிமை;
தன்னம்பிக்கை என்ற ஒரே சொல்
தரணி ஆளும் தந்திரம்.
மண்ணில் பிறந்த மனிதன் யாவும்
மகத்துவம் பெற இயலும்;
தன்னை நம்பும் துணிவு கொண்டால்
தெய்வமும் அவன் துணை நிற்கும்.
இன்று விதைத்த உறுதி விதை
நாளை வெற்றிப் பயிராகும்;
சோர்வு ஒழிந்து செயலில் நிலைத்தால்
சிகரம் தானே குனியும்.
எழு மனிதா! எரியும் கனவுடன்,
எண்ணம் தளர விடாதே;
உன்னை நம்பும் அந்த நொடியே
உன் வாழ்க்கை மாறும் தருணமே!