Vijay: தமிழக வெற்றி கழகத் தலைவர் விஜய், மதுரை மாநாட்டில் பேசிய போது, முன்னாள் முதல்வர் எம்ஜிஆர் பற்றி உயர்த்தி பேசியிருந்தார். “எம்ஜிஆர் இருக்கும் வரை முதல்வர் பதவிக்கு தமிழ்நாட்டில் யாரும் போட்டி போட முடியவில்லை. அவர் உடல்நிலை சரியில்லாமல் அமெரிக்காவில் இருந்தபோதும், ‘எனக்கு பதவி கொடுங்கள், என் நண்பன் வந்தவுடன் கொடுத்து விடுகிறேன்’ என்று கருணாநிதி மக்களிடம் கெஞ்சி கேட்டார்” என்று கூறியிருந்தார்.
அதோடு, “அப்படிப்பட்ட எம்ஜிஆர் உருவாக்கிய அதிமுக கட்சி இப்போது எந்த நிலையில் இருக்கிறது பாருங்கள். அந்தக் கட்சியின் தொண்டர்கள் பாவம்” என்று வருந்தியும் பேசியார். இந்த பேச்சு, அங்கு இருந்த அவரது ஆதரவாளர்களிடையே பெரும் கைதட்டலையும் பாராட்டையும் பெற்றது.
எடப்பாடி பழனிசாமியின் கண்டனம்
ஆனால், இந்தக் கருத்துக்கு எதிராக அதிமுக பொதுச் செயலாளர் எடப்பாடி கே. பழனிசாமி (EPS) கடும் கண்டனம் தெரிவித்துள்ளார். “எம்ஜிஆர் மற்றும் ஜெயலலிதா உருவாக்கிய அதிமுகவின் வரலாற்றைப் பற்றி விஜய்க்கு பேசும் தகுதி உண்டா?” என்று அவர் கேள்வி எழுப்பினார்.
EPS மேலும், “ஒரு காலத்தில் தலைவா படத்தின் ரிலீஸ் பிரச்சனையில் ஜெயலலிதாவிடம் மன்னிப்பு கேட்க விஜய் கொடநாடு வந்தார். ஆனால் ஜெயலலிதா அவரை சந்திக்கவே இல்லை. பிறகு அவர் காரில் வரும்போது சாலையில் நின்றபடியே சந்தித்து மன்னிப்பு கேட்டார். அதை விஜய் மறந்துவிட்டாரா? இப்போது சுயமரியாதை பற்றி அவர் பேசுவது சரியா?” என்று கடுமையாக விமர்சித்துள்ளார்.
சமூக வலைதளங்களில் வாதப் பிரதிவாதம்
இந்த சம்பவம் சமூக வலைதளங்களில் பெரிய அளவில் பேச்சு பொருளாக மாறியுள்ளது. விஜய்யின் ஆதரவாளர்கள், “அவர் எம்ஜிஆர் பற்றிய வரலாற்றை உண்மையாகவே கூறியுள்ளார், அதில் தவறு எதுவும் இல்லை” என்று வாதிடுகின்றனர். அதிமுக தொண்டர்கள், “எம்ஜிஆர், ஜெயலலிதா குறித்து விஜய்யால் பேச முடியாது, ஏனெனில் அவர் ஒருகாலத்தில் ஜெயலலிதா முன்னிலையில் மன்னிப்பு கேட்டவர்” என்று பழைய சம்பவங்களை மீண்டும் நினைவுபடுத்தி வருகின்றனர்.
விஜயின் அரசியல் பாணி சோதனைக்கு உட்பட்டதா?
விஜய் தனது பேச்சில் எம்ஜிஆர் மற்றும் விஜயகாந்த் ஆகியோரின் நினைவுகளை எடுத்துரைப்பதன் மூலம், தனது அரசியல் பயணத்தை மக்களுடன் உணர்ச்சி ரீதியாக இணைக்க முயல்கிறார். ஆனால், அதே நேரத்தில் எதிர்க்கட்சிகள் மற்றும் விமர்சகர்கள், அவரது பழைய நிகழ்வுகளை முன்னிறுத்தி வாதங்களை தொடுகிறார்கள்.
அடுத்தடுத்த அரசியல் களத்தில் தாக்கம்?
இப்போது கேள்வி என்னவென்றால் – எம்ஜிஆர் பற்றிய பாராட்டால் அவர் அதிமுக தொண்டர்களின் மனதை வெல்வாரா, அல்லது EPS-இன் கடும் விமர்சனங்கள் அவரது பெயருக்கு சவாலாக மாறுமா? எனும் நிலை தான்.
விஜய்யின் ஒவ்வொரு வார்த்தையும், அடுத்தடுத்த அரசியல் சூழ்நிலையில் பெரிய தாக்கத்தை ஏற்படுத்தும் என்பதில் எந்த ஐயமும் இல்லை.
